ដោយ : បន្ទាយ

ពោធិ៍សាត់ :  ស្ពានលេខ២៨ មានកម្ពស់៩០ម៉ែត្រជាស្ពានខ្ពស់ជាងគេ ប្រវែង ៥៣០ម៉ែត្រ លើផ្លូវជាតិលេខ១០ ជាផ្លូវថ្មីនោះ សម្រេចការសាងសង់បាន៩៣% ហើយ ហើយគ្រោងនឹងដាក់ឱ្យប្រើប្រាស់បណ្តោះអាសន្ននៅថ្ងៃទី១៨ ខែមីនា ឆ្នាំ២០២៥ ខាងមុខនេះ។

ផ្លូវជាតិលេខ១០ ជាផ្លូវថ្មីស្ថាបនាចាប់បំបែកពីផ្លូវជាតិលេខ៥៧-៧ ត្រង់ PK ៣៥+៩០០ ភូមិបញ្ចាំង ឃុំស៊ុង ស្រុកសំឡូត ខេត្តបាត់ដំបង ឆ្លងកាត់ឃុំក្រពើពីរ ឃុំប្រម៉ោយ ឃុំអូរសោម ស្រុកវាលវែង ខេត្តពោធិ៍សាត់ រហូតដល់ផ្លូវជាតិលេខ៤៨ ត្រង់ PK១+៧០០  ប្រវែងសរុប ១៩៨,៥១គីឡូម៉ែត្រ ស្ថិតក្នុងសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង សម្រេចបាន ៩៦,១៦%។

ឱ្យដឹងដូច្នេះនាឱកាសដែលលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូននិងប្រតិភូ បានអញ្ជើញចុះពិនិត្យវឌ្ឍនភាពការងារសាងសង់ផ្លូវជាតិលេខ ១០នេះ កាលពីថ្ងៃទី២ ខែកុម្ភៈ ឆ្នាំ២០២៥  និងមានការចូលរួមពីថ្នាក់ដឹកនាំក្រសួងដែលទទួលបន្ទុកការងារ និងមន្រ្តីជំនាញពាក់ព័ន្ធផងដែរ។

ការងារសាងសង់ផ្លូវជាតិលេខ ១០ (ឬអតីតផ្លូវជាតិ១៥៥១) បានជួបនឹងផលប៉ះពាល់បរិស្ថានជាច្រើន ដែលតម្រូវឱ្យមានការផ្លាស់ប្តូរគន្លងផ្លូវថ្មីពីខ្សែខាងកើត (East Line ) មកខ្សែខាងលិច(West Line)  មានប្រវែង ៦៥,៧៤គីឡូម៉ែត្រ ។

បច្ចុប្បន្នឬគិតត្រឹមខែធ្នូ ឆ្នាំ២០២៤ សម្រេចការសាងសង់បាន ៩៦,១៦%។

ដោយឡែកសម្រាប់ស្ពានលេខ២៨ នៃគម្រោងស្ថាបនាផ្លូវជាតិលេខ១០ គឺជាស្ពានខ្ពស់ជាងគេនៅកម្ពុជា ដែលមានកម្ពស់៩០ម៉ែត្រ ប្រវែងសរុប ៥៣៧ម៉ែត្រ បច្ចុប្បន្នស្ពានខ្ពស់ជាងគេនេះសម្រេចការសាងសង់បាន ៩៣%ហើយ ឬអាចនិយាយថា ស្ពាននេះនឹងត្រូវដាក់ឱ្យប្រើប្រាស់សាកល្បងនៅថ្ងៃទី១៨ ខែមីនា ឆ្នាំ២០២៥ ខាងមុខនេះ គឺមុនពិធីបុណ្យចូលឆ្នាំថ្មីប្រពៃណីជាតិខ្មែរ។

ស្ពាននេះស្ថិតក្នុងគម្រោងស្ថាបនាផ្លូវជាតិលេខ១០ មានចំណុចកណ្តាលស្ពានស្ថិតនៅត្រង់គីឡូម៉ែត្រលេខ ១២៨+៩០៥ ហើយកាត់តាមជ្រលងស្ទឹងឫស្សីជ្រុំ មានមុំប្រសព្វ ៩០ដឺក្រេ។

ដោយប្រើប្រាស់ហិរញ្ញប្បទានរដ្ឋាភិបាលសាធារណរដ្ឋប្រជាមានិតចិន  ក្រុមហ៊ុនសាជីវកម្មស្ពាននិងថ្នល់ចិន (CRBC) បានឲ្យដឹងថា : សំណង់ផ្នែកខាងលើ មានធ្នឹមប្រភេទអក្សរ T ផ្នែកខាងកើតមាន ៤ប្រឡោះ ផ្នែកកណ្តាលជាប្រភេទធ្នឹមប្រអប់ខ្សែកាបទាញមាន ៣ប្រឡោះ និងផ្នែកខាងលិចប្រភេទធ្នឹមអក្សរ T មាន៥ប្រឡោះ ។

ចំណែកឯសំណង់ផ្នែកខាងក្រោមមានទម្រក្បាលស្ពាន និងធ្នឹមទទឹង (សម្រាប់ទ្រធ្នឹមប្រភេទអក្សរ “T”) ប្រើសសរមូលជួរឈរ និងប្រភេទគ្រឹះខួង ព្រមទាំងធ្នឹមទទឹងប្រើសសរបែបជញ្ជាំងជួរឈរ និងប្រភេទគ្រឹះខួង។

គម្រោងសាងសង់ផ្លូវនេះ ត្រូវបានរាជរដ្ឋាភិបាលបន្ថែមខ្ទង់ចំណាយ ៥៧លានដុល្លារបន្ថែមទៀត លើគម្រោងចាស់ដែលមានចំនួន១៨៨លានដុល្លារអាមេរិក ក្រោមហិរញ្ញប្បទានពីប្រទេសចិន និងថវិកាបដិភាគរបស់រាជរដ្ឋាភិបាលកម្ពុជា ដើម្បីបញ្ចៀសពីការពុះកាត់ភ្នំក្រវាញជាពីរផ្នែក ដែលធ្វើឱ្យខូចខាតប្រព័ន្ធបរិស្ថាន និងទីជម្រករបស់ពពួកសត្វព្រៃ ខណៈបច្ចុប្បន្នព្រៃឈើនៅតំបន់។

ផ្លូវជាតិលេខ១០  ត្រូវបានប្រកាសបើកការដ្ឋានសាងសង់ក្នុងពិធីសម្ពោធបើកឲ្យប្រើប្រាស់ជាផ្លូវការផ្លូវជាតិលេខ៥៥ កាលពីព្រឹកថ្ងៃទី០៩ ខែមីនា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់ពីសំណាក់សម្តេចនាយករដ្ឋមន្រ្តី ហ៊ុន សែន និងឯកអគ្គរដ្ឋទូតចិន លោក Wang Wentian។

លោកស៊ុន ចាន់ថុល អតីតរដ្ឋមន្រ្តីក្រសួងសាធារណការ និងដឹកជញ្ជូនបានឲ្យដឹងថា ផ្លូវជាតិលេខ១០នេះ ត្រូវសាងសង់ស្របទៅតាមស្តង់ដារ ផ្លូវថ្នល់កម្រិត៣ នៃបទដ្ឋានបច្ចេកទេសរបស់សាធារណរដ្ឋប្រជាមានិតចិន មានទទឹងតួផ្លូវសរុប៩ ម៉ែត្រ ក្រាលកៅស៊ូពីរស្រទាប់ (DBST) ទទឹង ៨ម៉ែត្រ ដែលនឹងត្រូវប្រើរយៈពេលសាងសង់ ៤៨ ខែ គិតចាប់ខែធ្នូ ឆ្នាំ២០១៩ ដល់ខែធ្នូ ឆ្នាំ២០២៣។

ជាមួយគ្នានេះដែរ ផ្លូវជាតិលេខ៥៥ ដែលតភា្ជប់ចាប់ពីផ្លូវជាតិលេខ៥ ត្រង់ស្វាយអាត់ក្បែរបូជនីយដ្ឋានឃ្លាំងមឿង ក្រុងពោធិ៍សាត់ ឆ្ពោះទៅកាន់ថ្មដា ស្រុកវាលវែង ព្រំដែននឹងខេត្តត្រាតប្រទេសថៃត្រូវបានដាក់សម្ពោធឱ្យប្រើប្រាស់ជាផ្លូវការដូចវេលាខាងលើ។

ផ្លូវទាំងពីរខ្សែនេះនឹងជួយសម្រួលដល់ការតភ្ជាប់ទំនាក់ទំនងគមនាគមន៍ និងការធ្វើសមាហរណកម្មតភ្ជាប់ផ្ទៃក្នុងប្រទេស ជាមួយប្រទេសជិតខាងផងដែរ។

រាជរដ្ឋាភិបាលកម្ពុជា បានចាត់ទុកផ្លូវជាតិលេខ១០ ដែលបានតភ្ជាប់ពីសំឡូត-វាលវែង-អូរសោម ដល់កោះកុងនេះ នឹងជួយសម្រួលបានច្រើនក្នុងជួយដឹកជញ្ជូនកសិផលរបស់ប្រជាពលរដ្ឋ និងការដឹកជញ្ជូនទំនិញផ្សេងៗ តាមរយៈការកាត់បន្ថយលើការចំណាយពេលវេលា ចំណេញថវិកាបានច្រើន ដោយយើងអាចដឹកទំនិញបានពីខេត្តបន្ទាយមានជ័យ បាត់ដំបងនិងប៉ៃលិន ទៅកាន់ខេត្តកោះកុង ចុះទៅកំពង់ផែទឹកជ្រៅត្រង់តែម្តង ដោយមិនចាំបាច់ធ្វើដំណើរឆ្លងកាត់រាជធានីភ្នំពេញ ខេត្តកណ្តាល កំពង់ស្ពឺទៀតនោះទេ៕